Forstjóri Hampiðjunnar segir starfi sínu lausu

Jón Guðmann Pétursson hefur sagt upp starfi sínu sem forstjóri Hampiðjunnar og mun láta af störfum í lok maí mánaðar nk. Hann mun verða stjórn og nýjum forstjóra til ráðgjafar eftir því sem þörf verður á.

Stjórn félagsins hefur samið við Hjört Erlendsson, framkvæmdastjóra neta og kaðlaframleiðslu, um að hann taki tímabundið að sér starf forstjóra Hampiðunnar þar til nýr forstjóri hefur verið ráðinn. Hjörtur er 56 ára tæknifræðingur og hefur verið staðgengill Jóns undanfarin ár.

Vilhjálmur Vilhjálmsson, stjórnarformaður:

Uppsögn Jóns kom ekki alfarið á óvart því hann hafði orðað hug sinn í þeim efnum fyrir allnokkru. Jón hefur verið í lykilhlutverki í Hampiðjunni í langan tíma og sem forstjóri frá 2001. Hann hefur leitt endurskipulagningu félagsins með þeim árangri að síðustu þrjú ár hafa verið þau bestu í 80 ára langri sögu Hampiðjunnar. Ég vil þakka honum einstaklega farsælt og gott starf fyrir Hampiðjuna og óska honum alls hins besta.

Jón Guðmann Pétursson:

Ég hef í nokkurn tíma haft hug á að eiga minn tíma sjálfur. Ákvörðun í þeim efnum hefur dregist vegna ýmissa ástæðna síðustu misserin en nú er rétti tíminn til að setja punkt. Hef starfað hjá Hampiðjunni í 27 ár, þar af hálfan tímann sem forstjóri. Hampiðjan, sem verður áttatíu ára gömul á næstu dögum, hefur aldrei staðið betur eða verið verðmætari fyrir hluthafa og því þægilegur tími að stíga frá borði.