Hampiðjan var stofnuð árið 1934 í kreppunni miklu og hefur þróast í stórt alþjóðlegt fyrirtæki með starfsemi á 72 stöðum í 21 landi og um 2.000 starfsmenn. Höfuðstöðvarnar eru við Skarfabakka í Sundahöfn en þar eru aðalskrifstofurnar, netaverkstæði og aðallager fyrirtækisins á Íslandi. Hjarta framleiðslunnar á vörum fyrirtækisins er Hampidjan Baltic í Litháen, þar sem framleiddir eru þræðir, hnýtt net og fléttaðir ofurkaðlar ásamt framleiðslu á fullbúnum veiðarfærum.
Hjörtur Erlendsson
Forstjóri
„Við erum staðráðin í að halda forystunni og vera þar fremst í flokki. Ríflega 90 ára saga okkar hefur sýnt okkur að vöruþróun og nýsköpun er lykilatriði í því að ná þessum tveimur markmiðum. Kjarninn í starfsemi okkar er stöðug og þrotlaus vöruþróun og því vita viðskiptavinir okkar að vörur og hönnun Hampiðjunnar byggir ætíð á bestu tækniþekkingu sem völ er á.“
„Vorið 1934, þegar kreppan mikla var í algleymingi, stofnaði þrettán manna hópur skipstjóra og vélstjóra nýtt framleiðslufyrirtæki í Reykjavík til að framleiða trollnet, tóg og fiskilínur fyrir íslenska fiskiskipaflotann því mikill skortur var á þessum efnum til veiðarfæragerðar milli stríða.
Hampiðjan hefur síðan vaxið og dafnað og er nú eitt stærsta veiðarfærafyrirtæki heims. Framleiðsla á netum og köðlum hefur ætið verið kjarnastarfsemi fyrirtækisins. Síðustu tvo áratugina höfum við aukið markaðsforskot okkar enn frekar með byltingarkenndum vörum og snjöllum lausnum fyrir fiskveiðar og olíuiðnað, einkum margvíslegum útfærslum á ofurtógum sem eru sterkari en stál.
Tveir stórir áfangar urðu hjá Hampiðjunni árið 2023 þegar lokið var kaupum á norska fyrirtækinu Mørenot og í framhaldi af því skráning á aðallista Nasdaq Iceland. Með þessum áföngum opnast mikil tækifæri til enn frekari vaxtar og hagræðingar.
Við fögnum framtíðinni og þeim tækifærum sem þar bíða. Við ætlum okkur að halda áherslunni á stöðuga nýsköpun og vöruþróun sem er forsenda þess að Hampiðjan geti haldið áfram á þeirri vegferð sem hún hefur verið á undanfarin ár og áratugi. Við hlökkum til að halda áfram að þjóna viðskiptavinum okkar vel og setja okkar mark á góða umgengni við hafið og fiskveiðiauðlindina. Áhersla Hampiðjunnar á sjálfbærni í umhverfismálum undirstrikar hlutverk hennar sem ábyrgs samfélagsþegns.“
© 2024 Hampiðjan.
